Ninaweza Kuijenga Upya Imani Baada Ya Kuanguka?

Kuanguka kutoka kwenye imani kunaweza kuhisiwa kama kupotea katika jangwa la kiroho—kavu, mbali, na lisilo na uhakika.

Iwapo lilitokea taratibu au lilichochewa na tukio chungu, safari ya kurudi kwa Mungu inaweza kuonekana kuwa ngumu sana. Habari njema ni kwamba hauko peke yako, wala hujapotea kupita kiasi. Kwa kweli, Maandiko yamejaa hadithi za urejesho, ukombozi, na kurudi nyumbani.

Ikiwa moyo wako unatamani kuungana tena na unajiuliza, “Je, kweli naweza kurudi?” basi endelea kusoma. Kwa sababu katika makala haya, tutaangazia hatua za vitendo, zilizo katika misingi ya Biblia, ambazo unaweza kuchukua ili kuanza kujenga upya imani yako.

Utajifunza mambo yafuatayo:

• Kwamba Mungu bado anakutafuta, hata sasa
• Jinsi ya kukabiliana na hatia, aibu, na mashaka ya kiroho
• Misingi rahisi inayokusaidia kuungana tena na Mungu kila siku
• Faraja kutoka kwa watu wa Biblia waliojitenga lakini wakarudi kwa Mungu
• Jinsi jamii na maswali ya kweli yanavyosaidia katika kupona na kukua kiroho

Hebu tuchukue safari hii pamoja—kumuelekea Mungu ambaye hakuwahi kuacha kukupenda.

Mungu bado anakutafuta, hata sasa

Hata tunapopoteza imani, Mungu hatupotezi machoni pake.

Kutembea kwetu mbali hakuwezifuta msamaha wake. Kama baba aliye katika mfano wa mwana aliyepotea, Mungu anasimama akiwa na mikono wazi, akikusubiri urudi (Luka 15:11-32). Hii sio hadithi tu nzuri. Ni picha dhahiri ya uaminifu wa Mungu, wema wake, na tamaa yake kubwa ya kurekebisha kilichovunjika.

Huenda ukahisi kwamba imani yako iliyovunjika inakutenga kuwa karibu na Mungu. Lakini sio hivyo. Agano la Kale limejaa hadithi za watu waliokuwa wamekwepa mapenzi ya Mungu—kama Yona, Musa, na Daudi—waliopata uponyaji, urejesho, na kusudi tena.

Mwandishi wa Zaburi anafafanua wazi:

“BWANA yu karibu nao waliovunjika moyo,
Na waliopondeka roho huwaokoa” (Zaburi 34:18, NKJV).

Chukua muda sasa kutafakari: Ikiwa Mungu hajakoma kunitafuta, basi nini kinanizuia kuchukua hatua moja kurudi kwake?

Je, inaweza kuwa hatia au aibu? Hebu tuone jinsi ya kukabiliana nayo.

Jinsi ya kukabiliana na hatia, aibu, na shaka za kiroho

Kizuizi kikubwa katika kujenga imani upya ni wingu la hatia, aibu, na maswali yasiyojibiwa.

Huenda ukajisikia kutokuwa na uhakika, ukijiuliza: Je, naweza kurudi baada ya yote niliyoyafanya au mashaka niliyokuwa nayo?

Tuwe wakweli, shaka na maswali ni sehemu ya kila safari ya imani ya maisha yote. Hata wafuasi wa Yesu walijikuta wakipigana na hofu, mkanganyiko, na kushindwa kiroho. Petro, baada ya kukana Yesu mara tatu, alirejeshwa sio kwa adhabu, bali kwa neema, msamaha, na wito mpya (Yohana 21).

Badala ya kuficha mashaka yako, yapeleke kwa Mungu kupitia sala, toba, na tafakari juu ya Neno Lake. Tumia mbinu kama ramani ya aya katika Biblia na kukumbuka maneno maalum kutoka katika aya hizo ili kuimarisha mawazo yako wakati hofu, wasiwasi, na woga vinapojaribu kukutawala.

Hakuna hukumu katika Kristo, kama Paulo anavyosema:

“Sasa, basi, hakuna hukumu ya adhabu juu yao walio katika Kristo Yesu….. tusioenenda kwa kufuata mambo ya mwili, bali mambo ya roho” (Warumi 8:1,4; NKJV).

Kupitia mchakato wa kutoka katika hatia kwenda kwenye neema hufungua moyo kuamini tena. Basi, tunawezaje kujenga imani hiyo kwa vitendo katika maisha yetu ya kila siku?

Tabia rahisi zinazo kuunganisha tena na Mungu kila siku

Kujenga upya imani yako sio lazima kuanza na matendo makubwa. Inaanza kwenye ushindi mdogo mdogo: sala ya kunong’ona asubuhi, aya katika Biblia inayosomwa wakati wa chakula cha mchana, au wimbo unaoimbwa njiani kwenye foleni. Hizi ndizo nidhamu za kiroho zinazosaidia kurejesha tena imani iliyovunjika kati yako na Mungu.

Jaribu kujenga ratiba ya asubuhi inayoweka imani mbele ya yote:

• Anza kwa kuomba kabla ya kuangalia simu yako
• Tumia dakika 10 kusoma Maandiko, hasa Zaburi na Mithali
• Sikiliza nyimbo za ibada unapojitayarisha kwa ajili ya siku yako
• Maliza ratiba yako kwa muda mfupi wa shukrani na kumtumainia Mungu

Hata kama mwanzoni hujisikii kuwa karibu na Mungu, endelea tu kufanya hivyo. Uthabiti wako unamkaribisha Roho Mtakatifu kuamsha tena uhusiano wa kina zaidi.

Biblia inatukumbusha kwamba Mungu atamkaribia yeyote anayemtafuta:

“Mkaribieni Mungu, naye atawakribieni ninyi” (Yakobo 4:8, NKJV).

Lakini je, kweli inawezekana kurudi baada ya kuondoka? Hebu tuangalie wale waliowahi kufanya hivyo.

Himizo kutoka kwa wahusika wa Biblia waliowahi kuanguka lakini wakarejea tena kwa Mungu

Wewe sio wa kwanza kuhisi kuwa mbali na Mungu

Biblia inatupa hadithi zenye nguvu za imani za wanaume na wanawake waliomhoji Mungu, wakashindwa kumtii, lakini bado wakapokea ukombozi kamili.

• Eliya alikabiliana na msongo wa mawazo, hofu, na hata kutamani kufa. Hata hivyo, Mungu alihuisha wito wake (1 Wafalme 19).
• Musa aliuwa mtu na kukimbia, lakini baadaye aliongoza taifa zima.
• Petro alimkana Yesu, lakini akawa mmoja wa viongozi wa kanisa la kwanza.

Safari zao hazikuwa safi au fupi. Kulikuwa na majaribu, mateso, na uvumilivu mwingi pamoja na ustahimilivu. Hata hivyo, kila mmoja wao alikutana na mwongozo wa Mungu, msamaha, na neema, ambayo iliwasaidia kugundua tena kusudi lao na kupata imani tena.

Tunapaswa kukuza ujasiri wetu kwa Mungu na kuamini Maandiko yanaposema kuwa Mungu ndiye Mwenye mamlaka. Kama Paulo anavyowaonya katika kitabu cha Wafilipi:

“Nami niliaminilo ndio hili, ya kwamba Yeye aliyeanza kazi njema mioyoni mwenu ataimaliza hata siku ya Kristo Yesu” (Wafilipi 1:6, NKJV).

Kama wao waliweza kurudi kwenye njia sahihi, ninyi pia mnaweza. Lakini huna haja ya kutembea peke yako.

Na jamii yako pamoja na maswali yako ya dhati yanaweza kusaidia katika urejesho wako. Hebu tuone ni jinsi gani katika sehemu inayofuata.

Nafasi ya jamii na maswali ya dhati katika uponyaji na ukuaji wa kiroho

Mara nyingi, imani iliyopotea kwa kutengwa hurudi tena ndani ya jamii.

Jamii za Kanisa zenye afya, ushauri wa kiroho, na mshikamano wa mara kwa mara hutoa zaidi ya uwajibikaji. Hutoa uwepo, sala, mtazamo, na tumaini.

Yesu mara nyingi aliwarejesha watu sio tu kupitia nyakati za faragha, bali pia ndani ya jamii. Uponyaji ulitokea katikati ya umati. Urejeshaji ulifanyika katika nafasi zinazoshirikiwa. Utoaji wa mafundisho ya kiroho ulikuwa jitihada za kikundi.

Sulemani alifafanua wazi alipokuwa akiandika katika kitabu cha Mithali akisema:

“Chuma hunoa chuma; ndivyo mtu aunoavyo uso wa rafiki yake” (Mithali 27:17, NKJV).

Hapa kuna njia chache rahisi za kuungana tena na Mungu:

• Jiunge na jamii ya kiroho mtandaoni au ana kwa ana.
• Kuwa sehemu ya kikundi kidogo au somo la Biblia.
• Uliza maswali magumu katika mazingira salama na yanayo kukaribisha.
• Tumika katika huduma au shiriki katika matendo ya huduma ili kujihusisha tena kusudi lako.
• Simulia ushuhuda au hadithi yako ili kuhimiza wengine katika safari yao.

Uponyaji mara nyingi huanza tunapoacha kujifanya tunajua kila kitu na badala yake kuingia katika neema, uaminifu, na mahusiano.

Njia ya kurudi kwenye imani bado iko wazi

Huenda kwa sasa huna uhakika. Huenda bado unabeba mizigo ya zamani. Lakini fahamu hili: Ahadi za Mungu bado ni za kweli. Mikono yake bado iko wazi. Na safari ya kupata imani tena bado inapatikana kwako.

Huna haja ya kujenga upya imani yako yote kwa usiku mmoja. Anza tu na sala moja. Aya moja katika Biblia. Mazungumzo moja. Hatua moja kuelekea kwa Baba ambaye hajawahi kuacha kukupenda.

Hujatengwa. Unatafutwa na Mungu. Na hadithi yako haijaisha.

Unataka msaada zaidi unapojenga upya imani yako?

Tembelea sehemu ya Imani kwenye tovuti yetu ya Hope for Africa kupata himizo jipya, ushauri wa vitendo, na hekima ya kibiblia kwa safari yako.

Anza na machapisho haya yaliyochaguliwa kwa umakini:

• Ninawezaje Kusoma Biblia Yangu Zaidi? – Jifunze njia rahisi na za vitendo za kujenga tabia ya kusoma Maandiko mara kwa mara. Mwongozo huu utakusaidia kushinda usumbufu, kupata midundo yenye maana, na kusikia sauti ya Mungu kupitia Neno Lake.
• Kuzaliwa Upya Kunamaanisha Nini? – Makala haya yanaelezea dhana ya kibiblia ya kuzaliwa upya kiroho na ni nini kweli inamaanisha kuanza maisha mapya katika Yesu. Ni rasilimali nzuri ikiwa unajiuliza uko wapi na Mungu leo.
• Je, Mungu Anaweza Kurejesha Miaka Yangu Iliyopotea na Kunifanya Nijiwe Kamili Tena? – Kwa wale wanaohisi wamepoteza muda mwingi, chapisho hili linatoa tumaini, uponyaji, na uthibitisho kwamba mpango wa Mungu unajumuisha ukombozi hata katika misimu ngumu zaidi.